किराणा दुकानाच्या नावाखाली बोरीऐंदी–ताम्हणवाडी रस्त्यावर अवैध दारू विक्रीचा धुमाकूळ; यवत पोलिसांच्या कारवाईकडे नागरिकांचे लक्ष!
✍️ नितीन करडे
यवत : दौंड तालुक्यातील यवत पोलीस स्टेशन हद्दीत येणाऱ्या बोरीऐंदी–ताम्हणवाडी रस्त्यावर किराणा दुकानाच्या नावाखाली अवैध दारू विक्री सुरू असल्याची चर्चा परिसरात रंगली आहे. रस्त्याने प्रवास करणाऱ्या नागरिकांच्या निदर्शनास येत असून, या प्रकारामुळे परिसरातील सामाजिक वातावरणावर परिणाम होत असल्याची भावना नागरिकांकडून व्यक्त केली जात आहे.
बोरीऐंदी येथून ताम्हणवाडीच्या दिशेने जात असताना काही ठिकाणी समोरून किराणा दुकान असल्याचे दिसून येते; मात्र दुकानाच्या आडून मागील बाजूस दारू विक्री केली जात असल्याचा आरोप स्थानिक नागरिकांकडून करण्यात येत आहे. किराणा दुकानाच्या नावाखाली सुरू असलेल्या या प्रकारामुळे काही ठिकाणी तळीरामांचा अड्डा निर्माण झाल्याचे चित्र असल्याचे नागरिकांचे म्हणणे आहे.
या ठिकाणी दारू पिण्यासाठी येणाऱ्या व्यक्तींमुळे महिलांना, शालेय विद्यार्थ्यांना व सामान्य नागरिकांना त्रास सहन करावा लागत असल्याच्या तक्रारी पुढे येत आहेत. गोंधळ व अनुचित प्रकार घडणीची शक्यता नाकारताही येत नाही असे नागरिक सांगत आहेत. त्यामुळे नागरिकांमध्ये नाराजी व्यक्त होत आहे.
यवत पोलीस स्टेशनच्या हद्दीत अशा प्रकारे खुलेआम अवैध दारू विक्री सुरू असल्यास संबंधितांवर कठोर कारवाई करण्यात यावी, अशी मागणी नागरिकांकडून केली जात आहे. पोलीस प्रशासनाने या प्रकरणाची गांभीर्याने दखल घेऊन अवैध दारू विक्री करणाऱ्यांवर कारवाई करावी, अशी अपेक्षा व्यक्त होत आहे.
दरम्यान, यवत पोलीस या अवैध दारू विक्री करणाऱ्यांवर नेमकी कधी कारवाई करणार, याकडे परिसरातील नागरिकांचे लक्ष लागले आहे.
