पुणे-सोलापूर महामार्गावरील सोरतापवाडी येथे भरधाव कारच्या धडकेत मजूर गंभीर जखमी ; उरुळी कांचन पोलिसांत गुन्हा दाखल
✍️ नितीन करडे
उरुळी कांचन प्रतिनिधी : पुणे-सोलापूर महामार्गावरील सोरतापवाडी (ता. हवेली) परिसरात भरधाव कारने (मंगळवार 13 जुलै रोजी) पादचाऱ्याला धडक देऊन गंभीर जखमी केल्याची घटना घडली आहे. अपघातानंतर जखमी व्यक्तीला कोणतीही मदत न करता कारचालक वाहनासह घटनास्थळावरून निघून गेला. याप्रकरणी उरुळी कांचन पोलीस ठाण्यात अज्ञात कार चालकाविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, या प्रकरणी रघुनाथ कुमार मुखिया (वय 32 वर्षे, व्यवसाय मजुरी, रा. सोरतापवाडी, ता. हवेली, जि. पुणे, मूळ रा. बिहार) यांनी फिर्याद दिली आहे. सोमवार ता. 13 जुलै रोजी सायंकाळी सुमारे 4 वाजण्याच्या सुमारास रघुनाथ कुमार मुखिया हे पुणे-सोलापूर रोड क्रॉस करून सोरतापवाडी गावाकडे जात असताना सोलापूर बाजूकडून पुणे बाजूकडे जाणारी हुंदाई कंपनीची अल्काझर कार (क्र. एमएच 12 एक्सई 3207) ही भरधाव वेगात व निष्काळजीपणे चालवून चालकाने त्यांना जोरदार धडक दिली. या अपघातात फिर्यादी यांच्या डाव्या हाताला, खांद्याला, डाव्या पायाला व डोक्याला गंभीर दुखापत झाली. अपघातानंतर कारसह चालकने पुणे दिशेने पलायन केले.
याबाबत रघुनाथ कुमार मुखिया यांनी दिलेल्या फिर्यादीवरून उरुळी कांचन पोलीस स्टेशन मध्ये मोटार वाहन कायदा कलम तसेच विविध कलमानुसार गुन्हा दाखल करण्यात आला आहे. या घटनेचा पुढील तपास सहाय्यक पोलीस उपनिरीक्षक रमेश भोसले करत आहेत.
पुणे-सोलापूर महामार्गावर वाढत्या अपघातांच्या पार्श्वभूमीवर वाहनचालकांनी वेगावर नियंत्रण ठेवून वाहतुकीचे नियम पाळावेत, तसेच अपघात झाल्यास जखमींना तातडीने मदत करावी, अशी नागरिकांची मागणी आहे.
