पोलीस वर्धापन दिनानिमित्त एमआयटी विद्यापीठात व्यसनमुक्ती व रस्ता सुरक्षा सप्ताहाचे व्याख्यान
✍️नितीन करडे
पुणे : पोलीस वर्धापन दिनानिमित्त तसेच व्यसनमुक्ती व रस्ता सुरक्षा सप्ताहाच्या अनुषंगाने आज दि. ०६ जानेवारी २०२६ रोजी सकाळी ११.०० वाजता एमआयटी एडीटी विद्यापीठ, लोणी काळभोर (ता. हवेली, जि. पुणे) येथे विशेष व्याख्यानाचे आयोजन करण्यात आले होते. या कार्यक्रमाला विद्यार्थ्यांचा उत्स्फूर्त प्रतिसाद मिळाला.
या प्रसंगी प्रमुख मार्गदर्शक म्हणून डॉ. राजकुमार शिंदे (IPS), पोलीस उपायुक्त, परिमंडळ-०६, पुणे शहर उपस्थित होते. आपल्या मार्गदर्शनपर भाषणात त्यांनी स्वयंशिस्तीचे महत्त्व अधोरेखित करताना सांगितले की, “स्वयंशिस्तीमुळे वैयक्तिक स्वातंत्र्यावर मर्यादा येत नाही, उलट ती आपले संरक्षण करते.” वाहतूक सुरक्षेच्या संदर्भात बोलताना त्यांनी “खरे सामर्थ्य वेगात नसून नियंत्रणात असते” असे सांगत तरुणांनी वाहतूक नियमांचे काटेकोर पालन करणे अत्यावश्यक असल्याचे स्पष्ट केले. डॉ. शिंदे यांनी अंतर्गत सुरक्षेसाठी कम्युनिटी पोलिसिंगची गरज अधोरेखित करत पोलीस वर्धापन दिन सप्ताहादरम्यान तरुणांनी पोलीसांशी संवाद साधावा, पोलीस स्टेशनला भेट देऊन प्रत्यक्ष कामकाज समजून घ्यावे तसेच वाहतूक व्यवस्थापनात स्वयंसेवक म्हणून सहभागी होऊन पोलीस दलाचा अनुभव घ्यावा, असे आवाहन केले.
यावेळी राजेंद्र करणकोट, पोलीस निरीक्षक, हडपसर वाहतूक विभाग यांनी वाहतूक नियमांचे पालन करण्याचे महत्त्व विशद केले. एमआयटी विद्यापीठातील शिस्तीचे कौतुक करताना त्यांनी ही शिस्त आध्यात्मिक पायावर उभी असल्याचे नमूद केले व विद्यार्थ्यांना वाहतूक सुरक्षेबाबत सविस्तर मार्गदर्शन केले. तसेच राजेंद्र पन्हाळे, वरिष्ठ पोलीस निरीक्षक, लोणी काळभोर पोलीस स्टेशन यांनी पोलीस वर्धापन दिन सप्ताहाच्या निमित्ताने पोलीस स्टेशन येथे आयोजित विविध उपक्रमांची माहिती दिली. यासोबतच त्यांनी एनडीपीएस कायदा १९८५ मधील तरतुदी, अंमली पदार्थांचे दुष्परिणाम आणि त्यावरील कठोर कायदेशीर कारवाईबाबत विद्यार्थ्यांना मार्गदर्शन केले.
या कार्यक्रमाला एमआयटी एडीटी विद्यापीठाच्या कार्यकारी संचालक प्रा. डॉ. सुनिता कराड, कुलगुरू प्रा. डॉ. राजेश एस., पोलीस उपायुक्त डॉ. राजकुमार शिंदे, वरिष्ठ पोलीस निरीक्षक राजेंद्र पन्हाळे, पोलीस निरीक्षक राजेंद्र करणकोट, प्रा. कुलगुरू डॉ. रामचंद्र पुजेरी, कुलसचिव डॉ. महेश चोपडे, विद्यार्थी कल्याण सहाय्यक संचालक डॉ. प्रतिभा जगताप, अधिष्ठाता डॉ. गणेश पाठक यांच्यासह अनेक मान्यवर उपस्थित होते. या व्याख्यानातून विद्यार्थ्यांमध्ये व्यसनमुक्ती, रस्ता सुरक्षा आणि कायद्याबाबत जागरूकता निर्माण होण्यास मोठी मदत झाली, असे मत उपस्थितांनी व्यक्त केले.
