बिबट्याचा टिळेकरवाडी परिसरात वावर; परिसरातील शेतकऱ्यांमध्ये भीतीचे वातावरण
बिबट्याचा व्हिडिओ व्हायरल; वनविभागाने तात्काळ बंदोबस्त करावा, शेतकऱ्यांची मागणी
✍️ नितीन करडे
उरुळी कांचन : हवेली तालुक्यातील टिळेकरवाडी परिसरात बिबट्याच्या वावरामुळे शेतकरी व ग्रामस्थांमध्ये भीतीचे वातावरण निर्माण झाले आहे. बुधवार (ता. २९ जुलै) रोजी रात्री सुमारे साडेआठच्या सुमारास टिळेकरवाडी हद्दीतील रुपनवर वस्ती येथे सदाशिव टिळेकर यांच्या शेताच्या परिसरात बिबट्या प्रत्यक्ष फिरताना दिसल्याची घटना घडली. या घटनेचा व्हिडिओही परिसरात मोठ्या प्रमाणावर व्हायरल झाला असून नागरिकांमध्ये चिंतेचे वातावरण आहे.
मिळालेल्या माहितीनुसार, विनोद बेंगळे, दीपक राऊत आणि मारुती राऊत यांनी शेताच्या परिसरात बिबट्याला प्रत्यक्ष पाहिले. बिबट्याच्या हालचालींचा व्हिडिओ मोबाईलमध्ये कैद करण्यात आला असून तो सोशल मीडियावर वेगाने व्हायरल होत आहे. त्यामुळे परिसरातील शेतकरी, शेतमजूर तसेच नागरिकांमध्ये भीतीचे वातावरण पसरले आहे.
रुपनवर वस्ती तसेच आजूबाजूच्या शेतांमध्ये अनेक शेतकरी सकाळी लवकर आणि रात्री उशिरापर्यंत शेतीची कामे करतात. तसेच परिसरात पाळीव जनावरेही मोठ्या संख्येने असल्याने बिबट्याच्या वावरामुळे मानवी जीवितासह जनावरांच्या सुरक्षिततेचाही प्रश्न निर्माण झाला आहे.
स्थानिक शेतकऱ्यांनी वनविभागाने तात्काळ घटनास्थळी पाहणी करून पिंजरा लावावा, नियमित गस्त वाढवावी तसेच बिबट्याचा बंदोबस्त करून नागरिकांना दिलासा द्यावा, अशी जोरदार मागणी केली आहे. कोणतीही अनुचित घटना घडण्यापूर्वी वनाधिकाऱ्यांनी तातडीने उपाययोजना कराव्यात, अशी अपेक्षा परिसरातील ग्रामस्थांनी व्यक्त केली आहे. दरम्यान, बिबट्याचा व्हिडिओ व्हायरल झाल्यानंतर परिसरात या घटनेची मोठी चर्चा सुरू असून वनविभागाकडून पुढील कारवाईकडे सर्वांचे लक्ष लागले आहे. तसेच टिळेकर वाडीचे पोलीस पाटील विजयराव टिळेकर यांनी नागरिकांना सतर्क राहण्याच्या आवाहन केले आहे.
