पुणे-सोलापूर महामार्गावरील यवत जवळ थार व मोटारसायकलचा भीषण अपघात; दोघांचा जागीच मृत्यू
✍️ नितीन करडे
यवत : पुणे–सोलापूर महामार्गावरील यवत (ता. दौंड) पोलीस स्टेशन हद्दीतील जाऊजेबाची वाडी येथील प्रिन्स हॉटेल परिसरात बुधवारी (ता. २९ जुलै) रोजी रात्री थार आणि मोटारसायकल यांच्यात झालेल्या भीषण अपघातात मोटरसायकल वरील दोन जणांचा दुर्दैवी मृत्यू झाला.
अपघाताची तीव्रता इतकी भीषण होती की मोटारसायकलचा अक्षरशः चुराडा झाला. मिळालेल्या प्राथमिक माहितीनुसार, होंडा स्प्लेंडर मोटारसायकल (क्र. MH 25 BH 2566) वरून बालाजी कोचाळे (वय ४३,) आणि अशोक नाईकनवरे (वय ४२, ) दोघेही रा. भूम, जि. धाराशिव हे दोघे पुण्याच्या दिशेने जात होते. त्याचवेळी भरधाव वेगाने आलेल्या थार वाहनाने मोटारसायकलला जोरदार धडक दिली. या धडकेत दोघेही गंभीर जखमी झाले.
अपघातानंतर घटनास्थळी मोठी गर्दी झाली. प्रथमदर्शनी मिळालेल्या माहितीनुसार, संबंधित थार वाहनाच्या पुढील व मागील बाजूस क्रमांक प्लेट नसल्याचे सांगण्यात आले.
अपघातानंतर प्रिन्स हॉटेलचे मालक शिवाजी ननवरे, रणजीत मोर्डे, रोहित मोर्डे, आप्पा पांगारकर, सिद्धार्थ ननवरे तसेच कस्तुरी व वेदांत रुग्णवाहिकेचे चालक संतोष झोंबाडे, माऊली लाड, अमोल झोंबाडे आणि स्थानिक नागरिकांनी तत्काळ धाव घेत जखमींना उरुळी कांचन येथील सिद्धिविनायक हॉस्पिटल येथे दाखल केले. मात्र डॉक्टरांनी तपासणी करून उपचारापूर्वीच दोघांचा मृत्यू झाल्याचे घोषित केले. तसेच अपघाताचा अधिक तपास यवत पोलीस करीत आहेत. या घटनेने परिसरात हळहळ व्यक्त होत आहे.
