उरुळी कांचन : रिक्षा अपघातात एक महिला गंभीर; चालकासह चारजण जखमी
उरुळी कांचन (ता. हवेली) येथे पुणे–सोलापूर महामार्गावर बुधवार (३ डिसेंबर) रोजी दुपारी तीन वाजण्याच्या सुमारास झालेल्या भीषण अपघातात रिक्षातील एक महिला गंभीर जखमी झाली असून रिक्षाचालकासह तिघांना किरकोळ दुखापत झाली आहे.
मिळालेल्या माहितीनुसार, प्रवासी वाहतूक करणारी रिक्षा (एमएच ४२ एआर १३४२) ही सोरतापवाडी ग्रामपंचायत हद्दीतील अष्टविनायक नर्सरीसमोर रस्त्यावर थांबलेल्या ट्रकला (क्र. एमएच १२ केपी ५४५७) मागून जाऊन धडकली. अचानक झालेल्या धडकेत शोभना अडागळे (वय ३५, रा. कोंढवा) या गंभीर जखमी झाल्या. तर रिक्षाचालकासह इतर तीन प्रवाशांना किरकोळ दुखापत झाली.
अपघातानंतर परिसरातील नागरिकांनी तत्काळ मदतकार्य सुरू केले. घटनेची माहिती मिळताच कस्तुरी रुग्णवाहिकेचे चालक संतोष झोंबाडे व माऊली लाड यांनी घटनास्थळी धाव घेत जखमींना उरुळी कांचन येथील खाजगी रुग्णालयात उपचारासाठी दाखल केले. घटनेची माहिती मिळताच उरुळी कांचन पोलीस घटनास्थळी दाखल झाले.
महामार्गावर उभा असलेला ट्रक अपघातास कारणीभूत ठरल्याची प्राथमिक माहिती नागरिकांकडून समोर आली असून पुढील तपास पोलिसांकडून सुरू आहे.
