मुळा-मुठा नदीपात्रात अवैध वाळू उपसा?; प्रशासनाचे दुर्लक्ष?
✍️नितीन करडे
हवेली तालुक्यातील हिंगणगाव परिसरामधील मुळा-मुठा नदीपात्रात अवैध वाळू उपसा मोठ्या प्रमाणावर सुरू असल्याची माहिती समोर येत आहे. अनेक दिवसांपासून पोकलेनच्या सहाय्याने खोल खड्डे पाडून वाळू उपसा करण्यात येत असून, हा सर्व प्रकार रात्रीच्या अंधारात बेधडकपणे सुरू असल्याचा आरोप स्थानिक नागरिकांनी केला आहे.
नदीपात्रात वाळू उपशाचे वाहनं रात्री उशिरापर्यंत फिरताना वारंवार दिसत असूनही राजस्व विभाग, पोलिस आणि वन खात्याच्या संयुक्त कारवाईचा पूर्णतः अभाव दिसून येत असल्याचे स्थानिकांनी सांगितले. तसेच “हा अवैध वाळू उपसा कोणाच्या आशीर्वादाने चालू आहे?” असा प्रश्न गावात सातत्याने विचारला जात असून, या मागे प्रभावशाली लोकांचा हात असण्याची चर्चा रंगत आहे.
वाळू भरलेली वाहने जवळच्या रस्त्याने वन विभागाच्या हद्दीतून जात आहेत. वन विभागाकडून कोणतीही तपासणी किंवा कार्यवाही होत नसल्याचा आरोप केला जात आहे. तसेच नदीपात्रातील वाहत आलेली मोठी झाडे ही तोडून चोरी गेली असल्याचा आरोप स्थानिक करत असुन या दुर्लक्षावरून स्थानिक नागरिक संताप व्यक्त करत आहेत.
नैसर्गिक आपत्तीची भीती – नदीपात्रात खोल खड्डे?
पोकलेनच्या सहाय्याने मोठमोठे खड्डे पाडून वाळू उपसा सुरू असल्याने नदीच्या प्रवाहात बदल, किनाऱ्याची धूप आणि पावसाळ्यात अचानक येणाऱ्या पुराचा धोका वाढू शकतो, असा इशारा पर्यावरण प्रेमींनी दिला आहे. नदीपात्राचे मूळ स्वरूप बदलत चालल्याने भविष्यातील नैसर्गिक आपत्तीची तीव्र शक्यता निर्माण होत आहे.
हिंगणगाव येथील अवैध वाळू उपसा तात्काळ बंद करावा. संबंधित वाळू उपश्यासाठी नदीपात्रात येणाऱ्या सर्व सामग्रीवर त्वरित कारवाई ची मागणी स्थानिकांकडून होत असुन प्रशासनाने डोळेझाक केली तर मोठा अपघात वा पूरस्थिती निर्माण झाल्यावर जबाबदारी कोण? अशी चर्चा नागरिक करु लागेले आहेत.
