पुणे–सोलापूर महामार्गावर उरुळी कांचनमध्ये भरधाव टेम्पोची दुचाकीला धडक; अपघातात दोन गंभीर जखमी
नितीन करडे
उरुळी कांचन : पुणे–सोलापूर महामार्गावरील उरुळी कांचन पोलीस स्टेशनसमोर मंगळवार, दिनांक ३० डिसेंबर रोजी सकाळी साडे दहा वाजण्याच्या दरम्यान झालेल्या टेम्पो-दुचाकी अपघातात दोघे जखमी झाल्याची माहिती मिळाली आहे. दुचाकी स्वारांना भरधाव टेम्पोने जोरदार धडक दिल्याने हा अपघात झाला. धडकेची तीव्रता इतकी होती की दुचाकी रस्त्यावर फेकली गेली असून, दोन जण गंभीर जखमी झाले आहेत. अपघातात राजेंद्र एकनाथ खोमणे (वय ४५) व राहुल मारुती कोऱ्हाळे (वय ४७) हे गंभीर जखमी झाले आहेत. जखमी हे जय मल्हार रोड, उरुळी कांचन येथील असल्याचे समोर आले आहे. स्थानिकांनी तत्काळ मदतकार्य करत जखमींना उचलून जवळील खाजगी रुग्णालयात उपचारासाठी दाखल केले असून, दोघांवर गंभीर उपचार सुरू आहेत. अपघातानंतर घटनास्थळी गर्दी झाली. याची माहिती मिळताच उरुळी कांचन पोलिसांनी त्वरित घटनास्थळी धाव घेत वाहतूक सुरळीत केली व टेम्पो ताब्यात घेतला आहे. पुढील तपास पोलिसांकडून सुरू आहे. स्थानिक नागरिकांनी सांगितले की वाहन चालकांनी महामार्गावर वाहतुकीचा वेग नियंत्रणात ठेवावा तसेच पोलिसांनी वाहतूक शिस्तीवर अधिक लक्ष देण्याची आवश्यकता असल्याचे सांगितले.
