विषारी दारू हत्याकांडातील मुख्य आरोपी दत्ता लोंढे उरुळी कांचन पोलिसांच्या ताब्यात
पुणे : पुण्यातील विषारी दारू हत्याकांडातील मुख्य आरोपी दत्ता लोंढे याला उरुळी कांचन पोलिसांनी सापळा रचून ताब्यात घेतल्याची माहिती समोर आली आहे. उरुळी कांचन परिसरात हातभट्टी दारूचा मोठा व्यवसाय चालविणाऱ्या लोंढेचा पोलिसांकडून शोध सुरू होता.
पुण्यातील विषारी दारू प्रकरणात २१ जणांच्या मृत्यूला कारणीभूत ठरल्याचा आरोप दत्ता लोंढेवर आहे. पोलिसांची नजर चुकवण्यासाठी तो वेशभूषा बदलून परिसरात फिरत असल्याची माहिती पोलिसांना मिळाली होती. त्यानंतर उरुळी कांचनच्या वरिष्ठ पोलीस निरीक्षक विजयमाला पवार यांच्या मार्गदर्शनाखाली उरुळी कांचन पोलिसांनी सापळा रचत त्याला ताब्यात घेतले.
लोंढेला ताब्यात घेतल्यानंतर पुढील कायदेशीर प्रक्रियेसाठी त्याला सीआयडीच्या ताब्यात देण्यात येणार असल्याची माहिती आहे. दरम्यान, पुण्यातील विषारी दारू हत्याकांडाची गंभीर दखल घेत सीआयडीकडून या प्रकरणातील आरोपींवर मोक्का कायद्यांतर्गत कारवाई करण्यात आल्याचे सांगण्यात येत आहे. त्यामुळे बाळ्या उर्फ दत्ता लोंढेच्या अटकेकडे या संपूर्ण प्रकरणातील महत्त्वाची कारवाई म्हणून पाहिले जात आहे.
उरुळी कांचन परिसरातील अवैध हातभट्टी दारूच्या व्यवसायावर या कारवाईमुळे मोठा आळा बसण्याची शक्यता व्यक्त केली जात आहे. या प्रकरणाचा पुढील तपास सीआयडीकडून करण्यात येणार आहे.
