भरदिवसा उरुळी कांचनमध्ये दहशत! धारदार हत्यार घेऊन रस्त्यावर उच्छाद
उरुळी कांचन (ता. हवेली) येथे सोमवारी (ता. १३ एप्रिल) दुपारी एक धक्कादायक प्रकार घडला. साखरे पेट्रोल पंप ते पुणे-सोलापूर महामार्गवरील एचपी पेट्रोल पंप परिसरात एक व्यक्ती तब्बल दोन फूट लांबीचे धारदार लोखंडी हत्यार हातात घेऊन भर रस्त्यावर दहशत माजवत फिरत होता.
प्रत्यक्षदर्शींच्या माहितीनुसार, आरोपीने वाहनचालक आणि पादचाऱ्यांना हत्यार दाखवत धमकावले. परिस्थिती इतकी गंभीर झाली की अनेक नागरिकांनी भीतीपोटी आपला मार्ग बदलला. एवढेच नव्हे तर एका वाहनाला थांबवून त्यावर थेट हत्यार उगरले असल्याचे नागरिकांनी सांगितले .
या अचानक घडलेल्या प्रकारामुळे परिसरात काही काळ भीतीचे सावट पसरले होते. मात्र, संतप्त नागरिकांनी धाडस दाखवत त्या व्यक्तीला पकडून चांगलाच चोप दिला.
दरम्यान, घटनेची माहिती मिळताच उरुळी कांचन पोलीस स्टेशनचे पोलीस हवालदार उद्धव गायकवाड, निलेश जाधव, प्रवीण चौधर आणि होमगार्ड राजू मेंजी यांनी तत्काळ घटनास्थळी धाव घेत आरोपीला ताब्यात घेतले व त्याच्याकडील धारदार हत्यार जप्त केले.
या घटनेमुळे परिसरातील कायदा-सुव्यवस्थेवर प्रश्नचिन्ह निर्माण झाले असून नागरिकांमध्ये भीतीचे वातावरण आहे. पोलीस पुढील अधिक तपास करत आहेत.
