शेतकरी कुटुंबातील नामदेव खैरे यांची पोलीस उपनिरीक्षक पदावर निवड; जिद्द आणि मेहनतीची प्रेरणादायी कहाणी
✍️नितीन करडे
पुणे (प्रतिनिधी): जिद्द, चिकाटी आणि अथक परिश्रम यांच्या जोरावर शेतकरी कुटुंबातील नामदेव श्रीमंत खैरे यांनी उल्लेखनीय यश संपादन करत महाराष्ट्र पोलीस दलात पोलीस उपनिरीक्षक (PSI) पदावर निवड मिळवली आहे. त्यांच्या या यशामुळे कुटुंबीयांसह संपूर्ण परिसरात आनंदाचे वातावरण पसरले असून, विविध स्तरातून त्यांच्यावर अभिनंदनाचा वर्षाव होत आहे.
ग्रामीण भागातील अत्यंत साध्या कुटुंबातून आलेल्या नामदेव खैरे यांनी प्रतिकूल परिस्थितीतही शिक्षणाची वाट न सोडता सातत्याने आपल्या ध्येयासाठी प्रयत्न केले. आर्थिक अडचणी, स्पर्धा परीक्षेचा ताण आणि मर्यादित साधने यांचा सामना करत त्यांनी अभ्यासावर लक्ष केंद्रित ठेवले. कठोर परिश्रम आणि आत्मविश्वासाच्या बळावर त्यांनी हे यश मिळवत स्वतःची वेगळी ओळख निर्माण केली आहे.
विशेष म्हणजे, नामदेव खैरे यांनी यापूर्वी पुणे ग्रामीण पोलीस अधीक्षक संदीप पाटील यांचे अंगरक्षक म्हणून काम केले होते. या काळात त्यांना पोलीस प्रशासनाची कार्यपद्धती जवळून समजली तसेच वरिष्ठ अधिकाऱ्यांचे मोलाचे मार्गदर्शन लाभले. याच अनुभवाचा आणि मार्गदर्शनाचा उपयोग करून त्यांनी स्पर्धा परीक्षेची तयारी अधिक प्रभावीपणे केली.
“लक्षवेधी बाब म्हणजे, संदीप पाटील यांच्या मार्गदर्शनाखाली काम केलेले दोन्ही अंगरक्षक नामदेव श्रीमंत खैरे आणि युवराज गोपाळ धोंडे यांची पोलीस उपनिरीक्षक पदावर निवड झाली आहे. या दोघांनीही आपल्या यशाचे श्रेय संदीप पाटील यांच्या प्रेरणादायी मार्गदर्शनाला दिले आहे.”
सध्या नामदेव खैरे हे पुणे ग्रामीण पोलीस मुख्यालयात पोलीस शिपाई म्हणून कार्यरत होते. नोकरी सांभाळत त्यांनी अभ्यास सुरू ठेवला आणि अखेर PSI पद मिळवत त्यांनी आपल्या मेहनतीचे चीज केले. त्यांच्या या यशामुळे कुटुंबीयांचा अभिमान वाढला असून, गावकऱ्यांमध्येही उत्साहाचे वातावरण आहे.
नामदेव खैरे यांचा हा संघर्षमय आणि प्रेरणादायी प्रवास अनेक तरुणांसाठी मार्गदर्शक ठरत आहे. “परिस्थिती कितीही कठीण असली तरी जिद्द आणि मेहनतीच्या जोरावर यश मिळवता येते,” हा संदेश त्यांच्या यशातून स्पष्टपणे दिसून येतो.
