धार्मिक स्थळावर चोरट्यांचा डल्ला; उरुळी कांचनमध्ये घंटा चोरी
नितीन करडे
उरुळी कांचन (ता. हवेली) परिसरातील काळभैरवनाथ मंदिरातील घंटा चोरीला गेल्याची धक्कादायक घटना समोर आली आहे. ग्रामपंचायत हद्दीतील जुनी तांबे वस्ती येथील काळभैरवनाथ मंदिराच्या समोरील घंटा 31 डिसेंबरच्या रात्री अज्ञात चोरट्यांनी लंपास केली. ही घटना 1 जानेवारी रोजी सकाळी दर्शनासाठी आलेल्या भक्तांच्या लक्षात आल्यानंतर उघडकीस आली.
मध्यरात्रीच्या सुमारास ही चोरी झाल्याचा अंदाज असून चोरट्यांनी मंदिराच्या बाहेरील घंटा काढून नेली असल्याची माहिती मिळाली आहे. घटनेनंतर नागरिकांनी संताप व्यक्त केला असून चोरट्यांचा शोध घेण्याची मागणी केली आहे.
सदर प्रकरणाबाबत स्थानिक नागरिकांनी पोलीस स्टेशनमध्ये तक्रार दाखल करण्याची तयारी सुरू केली असून चोरट्यांचा शोध लावण्यासाठी सीसीटीव्ही फुटेज तपासण्याचीही चर्चा आहे. धार्मिक स्थळातील वस्तू चोरी जाण्याच्या या प्रकारामुळे परिसरात चिंतेचे वातावरण निर्माण झाले आहे. माहिती मिळताच घटनास्थळाची उरुळी कांचन पोलीस स्टेशनचे सहाय्यक पोलीस उपनिरीक्षक सुनिल सस्ते व पोलीस हवालदार उद्धव गायकवाड यांनी पहाणी केली.
