खेडेकर मळा येथे कार व शिवशाही बसचा भीषण अपघात; एक जण गंभीर जखमी – नागरिक व लाइफ केअर ॲम्बुलन्स कर्मचार्यांची धावपळ
✍️ नितीन करडे
यवत (ता. दौंड) : पुणे–सोलापूर महामार्गावरील यवत पोलीस स्टेशन हद्दीतील खेडेकर मळा येथे आज सायंकाळी सुमारे नऊ वाजण्याच्या सुमारास कार व शिवशाही बसचा भीषण अपघात झाला. या अपघातात कारचा अक्षरशः चक्काचूर झाला असून कारमधील एक जण गंभीर जखमी झाल्याची माहिती मिळते.
धडकेची तीव्रता इतकी प्रचंड होती की कारचे पुढील व बाजूचे सर्व भाग पूर्णपणे मोडून पडले. काही क्षण महामार्गावर वाहतुकीचा गोंधळ निर्माण झाला.
नागरिक व लाइफ केअर ॲम्बुलन्स कर्मचार्यांची तत्पर मदत
अपघातानंतर लाइफ केअर ॲम्बुलन्सचे मालक सिद्धू चव्हाण चालक किरण कदम व अजित कांबळे, तसेच स्थानिक नागरिक अजित चौधरी, प्रीतम काकडे, आकाश खेडेकर, अविनाश कांचन व सुहास बारंगुळे यांनी तात्काळ घटनास्थळी धाव घेत जखमी व्यक्तीला कारमधून बाहेर काढून उपचारासाठी उरुळी कांचन येथील खाजगी रुग्णालयात दाखल केले. जखमीची प्रकृती गंभीर असल्याचे समोर आले आहे.
उरुळी कांचन पोलीसांची ‘हद्द बाहेरील’ मदत — दाखवली तत्परता
अपघात यवत पोलीस स्टेशन हद्दीत असला तरी अपघाताची माहिती मिळताच उरुळी कांचन पोलीस स्टेशनचे पोलीस निरीक्षक सचिन वांगडे यांनी तातडीने आपली पोलीस टीम घटनास्थळी पाठवली. व उरळीकांचन पोलिसांनी अपघातग्रस्त वाहने बाजूला काढुन काही वेळातच महामार्गावरील झालेली वाहतूक कोंडी पूर्णपणे सुरळीत करण्यात आली. स्थानिकांनी याबद्दल समाधान व्यक्त केले आहे.
हद्द नसतानाही दाखवलेल्या या तत्परतेमुळे नागरिकाकडून पोलीस निरीक्षक सचिन वांगडे यांचे कौतुक!
