उरुळी कांचन परिसरात दत्त जयंती उत्साहात साजरी; हजारो भाविकांनी घेतला दर्शन व महाप्रसादाचा लाभ
✍️नितीन करडे
उरुळी कांचन प्रतिनिधी : पुर्व हवेलीतील उरुळी कांचन परिसरात गुरुवार (ता. ४ डिसेंबर) रोजी दत्त जयंतीचा सोहळा अत्यंत उत्साहात आणि भक्तिभावाने साजरा करण्यात आला. उरुळी कांचन, कोरेगाव मूळ, टिळेकरवाडी, भवरापूर, शिंदवणे, वळती, डाळिंब, नायगाव, पेठ, सोरतापवाडी तसेच परिसरातील अनेक गावांत दत्त जयंतीनिमित्त विविध धार्मिक कार्यक्रम, कीर्तन, पालखी सोहळे आणि महाप्रसादाचे आयोजन करण्यात आले. दत्त महाराजांच्या दर्शनासाठी सकाळपासूनच हजारो भाविकांची गर्दी होत होती. भक्तांनी दर्शन घेतल्यानंतर महाप्रसादाचा लाभ घेतला असून यावर्षी भाविकांचा उत्स्फूर्त प्रतिसाद पाहायला मिळाला. अनेक ठिकाणी महिलांनी, युवकांनी आणि स्थानिक सामाजिक संस्थांनी भक्तनिवास, पाण्याची व्यवस्था आणि विविध सेवा सुरू ठेवल्या.
उरुळी कांचन पोलीस स्टेशन, कस्तुरी ग्रुप, दत्तवाडी, दत्तनगर, बगाडे वस्ती, बस स्टॉप-रिक्षा स्टॅन्ड, तळवाडी सहा-सीटर स्टॅन्ड, तुपे वस्ती आदी ठिकाणी मोठ्या प्रमाणात महाप्रसादाचे आयोजन केले गेले. यात हजारो भाविकांनी महाप्रसादाचा लाभ घेतला.
पोलीस स्टेशनतर्फे पालखी सोहळा-
सकाळी सुमारे ११ वाजण्याच्या सुमारास उरुळी कांचन पोलीस स्टेशनच्या वतीने दत्त जयंती निमित्त पालखी सोहळ्याचे आयोजन करण्यात आले. पोलीस अधिकारी व कर्मचारी यांसह गावातील नागरिक मोठ्या संख्येने उपस्थित होते. “दिगंबरा दिगंबरा, श्रीपाद वल्लभ दिगंबरा” या गजरात पालखीची गाव प्रदक्षिणा संपन्न झाली.
भक्तिमय वातावरणाने परिसर दुमदुमला, सामाजिक संस्था आणि स्थानिक मंडळांनीही सोहळ्यात सक्रिय सहभाग नोंदविला. संपूर्ण परिसरात दत्तमय वातावरण निर्माण झाले होते. दिवसभर धार्मिक कार्यक्रम, भजने, दत्त जयंतीचे संदेश आणि भक्तीभावाची उर्मी पाहायला मिळाली.
उरुळी कांचन परिसरातील दत्त जयंतीचा हा उत्सव यशस्वीपणे पार पडण्यासाठी पोलीस प्रशासन, ग्रामस्थ, सामाजिक संस्था आणि विविध मंडळांनी विशेष प्रयत्न केल्याचे दिसून आले.
