पुणे–सोलापूर महामार्गावर दगड-धोंड्यांचा धोका; अपघातास निमंत्रण, नागरिकांचा संताप
✍️ नितीन करडे
उरुळी कांचन प्रतिनिधी : पुणे–सोलापूर महामार्गावरील सोरतापवाडी ग्रामपंचायत हद्दीतील सोरतापवाडी फाटा येथे गंभीर निष्काळजीपणाचा प्रकार समोर आला आहे. सोलापूरच्या दिशेने जाणाऱ्या मार्गावर एक ट्रक रस्त्याच्या खाली उतरल्याने संबंधित ठिकाणी महामार्गावरच मोठ्या प्रमाणात मोठे दगड ठेवण्यात आले आहेत. दगड महामार्गावरच ठेवल्याने वाहनचालकांच्या जीवाला मोठा धोका निर्माण झाला आहे.
महामार्ग हा नेहमीच वर्दळीचा असून दिवस-रात्र मोठ्या प्रमाणात अवजड व हलकी वाहने या मार्गाने प्रवास करतात. अशा परिस्थितीत रस्त्याच्या मध्यभागी किंवा कडेला विनासूचना ठेवलेले दगड हे अपघातास थेट निमंत्रण ठरत आहेत. विशेषतः रात्रीच्या वेळी किंवा वेगात येणाऱ्या वाहनांना हे दगड दिसणे कठीण जात असल्याने मोठा अपघात होण्याची शक्यता नाकारता येत नाही.
स्थानिक नागरिकांनी याबाबत तीव्र नाराजी व्यक्त केली असून, “तात्पुरत्या उपाययोजनांच्या नावाखाली महामार्गावर अडथळे निर्माण करणे धोकादायक आहे. अपघात झाल्यास जबाबदारी कोणाची?” असा संतप्त सवाल उपस्थित केला आहे. तसेच संबंधित प्रशासनाने तातडीने दखल घेऊन हे दगड हटवावेत आणि सुरक्षिततेची योग्य उपाययोजना करावी, अशी मागणी जोर धरत आहे. महामार्गावर अडथळा निर्माण करणारे दगड न हटवल्यास रात्रीत एखादा अपघात घडण्याचे नाकारता येत नाही.
दरम्यान, अशा प्रकारांमुळे आधीच अपघातप्रवण असलेल्या पुणे–सोलापूर महामार्गावरील धोका आणखी वाढत असल्याचे चित्र आहे. त्यामुळे संबंधित यंत्रणांनी त्वरित कारवाई करून संभाव्य दुर्घटना टाळाव्यात, अशी अपेक्षा नागरिकांकडून व्यक्त होत आहे.
