उरुळी कांचनमध्ये भीषण अपघात; रुग्णवाहिकेची मोटरसायकलला धडक, दोन गंभीर, एक किरकोळ जखमी
✍️ नितीन करडे |
पुणे–सोलापूर महामार्गावरील अपघातांची मालिका थांबण्याचे नाव घेत नाही. उरुळी कांचन येथे शनिवार (ता. २५ एप्रिल) रोजी सायंकाळी आठ वाजण्याच्या दरम्यान गंभीर अपघाताची घटना घडली असून, मोटरसायकलला रुग्णवाहिकेची धडक बसल्याने दोन जण गंभीर जखमी झाले असून एक जण किरकोळ जखमी झाल्याची माहिती समोर आली आहे.
मिळालेल्या प्राथमिक माहितीनुसार, उरुळी कांचन परिसरात भरधाव वेगात येणाऱ्या रुग्णवाहिकेने मोटरसायकलला जोरदार धडक दिली. या धडकेत मोटरसायकलवरील तिघे जण गंभीर जखमी झाले. अपघात इतका तीव्र होता की, जखमी काही अंतरावर फेकले गेले असल्याचे प्रत्यक्षदर्शींनी सांगितले.
घटनेनंतर परिसरात काही काळ गोंधळाचे वातावरण निर्माण झाले होते. मात्र, प्रसंगावधान दाखवत कस्तुरी रुग्णवाहिकेचे चालक माऊली लाड तसेच स्थानिक नागरिकांनी तत्काळ मदतकार्य हाती घेतले. जखमींना तातडीने जवळच्या खाजगी रुग्णालयात पुढील उपचारासाठी दाखल करण्यात आले.
” पाच दिवसापूर्वी शिंदवणे रोड येथे एका मोटरसायकल चालकाचा अपघात झाला होता त्या अपघातात एकाचे दोन्ही पाय निकामी झाले. तर दोन दिवसांपूर्वीच उरुळी कांचन येथील शिंदवणे चौकात 70 वर्षीय वृद्धाला विरुद्ध दिशेने येणाऱ्या टेम्पो ने धडक दिली होती त्यात उपचार दरम्यान वृद्धाचा मृत्यू झाला होता. ”
दरम्यान, पुणे–सोलापूर महामार्गावर सतत घडणाऱ्या अपघातांमुळे नागरिकांमध्ये भीतीचे वातावरण निर्माण झाले आहे. वेगमर्यादा, वाहतुकीचे नियम आणि सुरक्षिततेच्या उपाययोजनांकडे दुर्लक्ष होत असल्याने हा महामार्ग ‘मृत्यूचा सापळा’ ठरत असल्याची भावना नागरिक व्यक्त करत आहेत.
या घटनेची माहिती मिळताच पोलीस घटनास्थळी दाखल झाले. प्रशासनाने या महामार्गावरील वाढत्या अपघातांकडे गांभीर्याने लक्ष देऊन ठोस उपाययोजना कराव्यात, अशी मागणी नागरिकांकडून होत आहे
