उरुळी कांचनमध्ये व्यक्तीला अडवून सहा जणांकडून जबर मारहाण; व्यक्ती गंभीर जखमी!
✍️ नितीन करडे
उरुळी कांचन, (ता. हवेली) : उरुळी कांचन परिसरातील नऊमोरी परिसरात एका व्यक्तीला अडवून पाच ते सहा जणांनी बांबू, लोखंडी रॉड व पाइपने जबर मारहाण केल्याची धक्कादायक घटना सोमवार (दि. ५ ऑक्टोबर) रोजी सकाळी साडेनऊ वाजण्याच्या सुमारास घडल्याचे समोर आले आहे. या मारहाणीत संबंधित व्यक्ती गंभीर जखमी झाली असून, त्याच्या दोन्ही डोळ्यांसह हात व पायाला दुखापत झाल्याची माहिती आहे.
मिळालेल्या माहितीनुसार, सुनील चोधरी (वय ४०, रा. दत्तवाडी, उरुळी कांचन, मुळ गाव मध्य प्रदेश) हे नऊमोरी परिसरातून जात असताना काही व्यक्तींनी त्यांना अडविले. त्यानंतर पाच ते सहा जणांनी आपल्याला बांबू, लोखंडी रॉड व पाइपने मारहाण केल्याचे चोधरी यांनी सांगितले आहे. तसेच मारहाण झाल्यानंतर प्राथमिक आरोग्य केंद्रा समोर टाकून गेले असल्याचे सांगितले.
मारहाणीनंतर सुनील चोधरी हे जखमी अवस्थेत सुमारे १५ ते २० मिनिटे प्राथमिक आरोग्य केंद्रासमोर पडून असल्याचे सांगण्यात आले. घटनेची माहिती मिळताच उरुळी कांचन पोलीस ठाण्याचे पोलीस हवालदार राहुल आव्हाळे व पोलीस शिपाई सुदर्शन माने यांनी घटनास्थळी धाव घेतली.
पोलिसांनी घटनास्थळाची पाहणी करून जखमी सुनील चोधरी यांना तातडीने उपचारासाठी प्राथमिक आरोग्य केंद्रात दाखल केले. त्यांच्या दोन्ही डोळ्यांना तसेच हात व पायाला गंभीर दुखापत झाल्याचे प्राथमिक माहितीतून समोर आले आहे.
दरम्यान, मारहाणीमागील नेमके कारण काय, हल्ल्यात सहभागी असलेल्या व्यक्ती कोण आहेत. हे अजून स्पष्ट झाले नाही. पुढील तपास उरुळी कांचन पोलीस करत आहेत.
