पुणे–सोलापूर महामार्गावर भीषण वाहतूक कोंडी; कवडीपाट ते फुरसुंगी फाटा एक किलोमीटरसाठी दीड तास, वाहनचालक संतप्त
✍️ नितीन करडे
उरुळी कांचन प्रतिनिधी | पुणे–सोलापूर महामार्गावरील फुरसुंगी फाटा येथे शनिवारी (ता. १८ जुलै ) दुपारी सुमारे दोन वाजण्याच्या दरम्यान भीषण वाहतूक कोंडी झाल्याने हजारो वाहनचालकांना मोठा मनस्ताप सहन करावा लागला. कवडीपाट ते फुरसुंगी फाटा हे अवघे सुमारे एक किलोमीटरचे अंतर पार करण्यासाठी तब्बल एक ते दीड तास लागत असल्याने वाहनचालक आणि प्रवाशांमध्ये तीव्र नाराजी व्यक्त करण्यात आली.
वाहतुकीची परिस्थिती इतकी गंभीर झाली होती की अनेक वाहनचालकांनी वेळ वाचवण्यासाठी पुण्याच्या दिशेने विरुद्ध दिशेनेच वाहने चालवण्यास सुरुवात केली. त्यामुळे अपघाताचा धोका अधिक वाढला असून महामार्गावर काही काळ अत्यंत गोंधळाचे वातावरण निर्माण झाले.
वाहतूक कोंडीत अडकलेले विपुल घोडके यांनी सांगितले की, “कवडीपाट टोलपासून फुरसुंगी फाट्यापर्यंत पोहोचण्यासाठी एक ते दीड तास लागला. वाहनांच्या लांबच लांब रांगा लागल्या होत्या. नागरिकांचा वेळ, इंधन आणि संयम तिन्ही गोष्टींचा मोठा भुर्दंड बसला.”
दरम्यान, वाहतूक कोंडीची माहिती मिळताच हडपसर वाहतूक विभागाने तातडीने घटनास्थळी वाहतूक पोलिसांना रवाना केले. “वाहतूक शाखेचे पोलीस घटनास्थळी पाठवण्यात आले असून, लवकरात लवकर वाहतूक सुरळीत करण्यासाठी प्रयत्न सुरू आहेत,” अशी माहिती हडपसर वाहतूक विभागाचे पोलीस अधिकारी करणकोट यांनी दिली.
शनिवार असल्याने तसेच पुणे–सोलापूर महामार्गावर वाहनांची मोठी वर्दळ असल्यामुळे वाहतूक व्यवस्थेवर प्रचंड ताण आला. मात्र अशा महत्त्वाच्या मार्गावर वारंवार निर्माण होणाऱ्या वाहतूक कोंडीमुळे प्रशासनाच्या नियोजनावरही प्रश्नचिन्ह उपस्थित होत आहे.
वाहनचालकांनी महामार्गावरील वाहतूक व्यवस्थेत कायमस्वरूपी सुधारणा करण्याची, महत्त्वाच्या चौकांवर अतिरिक्त वाहतूक पोलीस तैनात करण्याची आणि भविष्यात अशा कोंडीची पुनरावृत्ती होऊ नये यासाठी ठोस उपाययोजना करण्याची मागणी केली आहे.
