✍️ नितीन करडे
उरुळी कांचन (ता. हवेली) येथे ता. ९ ऑगस्ट शनिवार रोजी निसर्गोपचार आश्रमातील एक महिन्याच्या मसाज प्रशिक्षणाचा यशस्वी समारोप उत्साहात संपन्न झाला. राष्ट्रपिता महात्मा गांधी यांच्या विचारांवर आधारित ऐतिहासिक निसर्गोपचार आश्रमात आयोजित पारंपरिक मसाज प्रशिक्षणाचा एक महिन्याचा कोर्स यशस्वीपणे पूर्ण झाला. या प्रशिक्षणात १८ पुरुष व १६ महिला अशा एकूण ३४ जणांनी सहभाग नोंदवला.
” उपचारक हात, मानवसेवेची वाट निसर्गोपचार आश्रमातील एक महिन्याच्या मसाज प्रशिक्षणाचा यशस्वी समारोप “
या चार आठवड्यांच्या प्रशिक्षणामध्ये सहभागी विद्यार्थ्यांनी पारंपरिक मसाज थेरपीचे सिद्धांत व प्रत्यक्ष कौशल्य याबरोबरच स्वच्छता, वर्तन व रुग्णसेवा यांसारख्या महत्त्वाच्या बाबींचे सखोल ज्ञान प्राप्त केले. त्यावेळी बोलताना डॉ. जय महाजन यांनी शरीररचना व शरीरक्रियाविज्ञान या विषयांवर शास्त्रीय माहिती दिली. तर सतीश सोनवणे यांनी विविध सैद्धांतिक वर्गांसह प्रत्यक्ष सराव सत्रांचे मार्गदर्शन केले. उच्च दर्जा टिकवण्यासाठी कोर्सच्या शेवटी लेखी परीक्षा घेण्यात आली. यावेळी यशस्वी उमेदवारांना विश्वस्त माऊली (नाना) कांचन व डॉ. अभिषेक अरुण देविकार वैद्यकीय संचालक व ट्रस्टी सचिव, निसर्गोपचार ग्रामसुधार ट्रस्ट यांच्या हस्ते प्रमाणपत्र देण्यात आले.
यावेळी डॉ. देविकार यांनी सर्व सहभागींचे अभिनंदन करत सांगितले की, हे कौशल्य “स्व-विकासासाठी, आरोग्य व्यवस्थापनासाठी आणि गांधीविचारांचे दूत बनून मसाज थेरपीच्या उपचारक कलाद्वारे मानवतेची सेवा करण्यासाठी एक मोठी संधी” ठरू शकते. तसेच हा कार्यक्रम फक्त एका कोर्सचा समारोप नव्हता, तर नव्याने प्रशिक्षित उपचारकांसाठी नव्या प्रवासाची सुरुवात होती. जे आपले कौशल्य घराघरात, समाजात व आरोग्यसेवेच्या विविध क्षेत्रांत पोहोचवून आरोग्य व सेवाभावाचा संदेश पसरवतील.
