शिंदवणे घाटात पावसाचा कहर; रस्त्यावर खडी-दगडांचा सापळा, प्रशासन झोपेत?
✍️ नितीन करडे |
उरुळी कांचन प्रतिनिधी : जेजुरी–बेल्हे महामार्गावरील शिंदवणे घाट (ता. हवेली) येथे बुधवारी (ता. १ एप्रिल) सायंकाळी झालेल्या पावसामुळे धोकादायक परिस्थिती निर्माण झाली आहे. घाटातील बाजूची माती, खडी, दगड व मोठे धोंडे थेट रस्त्यावर येऊन पडल्याने वाहनचालकांना अक्षरशः जीव मुठीत धरून प्रवास करावा लागत आहे.
जेजुरी–बेल्हे महामार्गावर शिंदवणे घाटात वाहनचालकांचा जीव धोक्यात; अनेक दुचाकी घसरल्या, चारचाकींचे टायर पंचर
पावसाच्या पाण्याच्या प्रवाहामुळे घाटातील माती घसरून रस्त्यावर आल्याने मार्ग धोकादायक बनला आहे. विशेषतः रात्रीच्या वेळी दृश्यमानता कमी असल्याने अनेक दुचाकी घसरून पडल्याच्या घटना घडल्या असल्याचे नागरिकांनी सांगितले, तर अनेक चारचाकी वाहनांचे टायर पंचर झाले. काही वाहनचालकांनी थोडक्यात मोठा अपघात टाळल्याचे सांगितले.
स्थानिक नागरिकांच्या मते, या घाटात दरवर्षी पावसाळ्यात अशीच परिस्थिती निर्माण होते. मात्र, याकडे संबंधित प्रशासन सातत्याने दुर्लक्ष करत असल्याचा आरोप होत आहे. पाऊस झाल्यावर वेळेत रस्त्याची साफसफाई होने गरजेचे आहे. वेळेत सफाई होत नसल्याने अपघातांना निमंत्रण मिळत आहे.
“अपघात झाल्यानंतरच प्रशासन जागे होणार का?” असा सवाल वाहन चालकांकडून उपस्थित केला जात आहे. तात्काळ रस्ता स्वच्छ करून सुरक्षित वाहतूक सुरू करण्याची मागणी जोर धरत आहे.
