पोलीस उपनिरीक्षकाच्या मुलाची उल्लेखनीय कामगिरी; दुहेरी सुवर्णपदकाची कमाई, प्रज्वल दाभाडे चे सर्वत्र कौतुक !
✍️ नितीन करडे
पुणे, प्रतिनिधी : महाराष्ट्रात झालेल्या राज्यस्तरीय धनुर्विद्या स्पर्धेत इंदापूर तालुक्यातील म्हसोबाचीवाडी येथील प्रज्वल धनंजय दाभाडे याने दमदार कामगिरी करत दुहेरी सुवर्णपदकाची कमाई केली आहे. या यशामुळे पुणे जिल्ह्याचा क्रीडाक्षेत्रात गौरव वाढला असून सर्वत्र त्याचे कौतुक होत आहे. महाराष्ट्र आर्चरी असोसिएशन व सोलापूर जिल्हा आर्चरी असोसिएशन यांच्या संयुक्त विद्यमाने नेहरुनगर क्रीडा संकुल येथे १२ ते १५ मार्च २०२६ दरम्यान १० व १३ वर्षांखालील गटातील राज्यस्तरीय धनुर्विद्या स्पर्धा उत्साहात पार पडल्या. या स्पर्धेत प्रज्वलने १० वर्षांखालील गटातील कंपाउंड प्रकारात आपली छाप पाडली.
वैयक्तिक गटात प्रज्वलने ३६० पैकी तब्बल ३५५ गुण मिळवत राज्यात अव्वल स्थान पटकावले. अचूक नेमबाजी, सातत्यपूर्ण खेळ आणि आत्मविश्वासाच्या जोरावर त्याने प्रतिस्पर्ध्यांवर मात करत सुवर्णपदकावर आपले नाव कोरले. स्पर्धेतील प्रत्येक फेरीत त्याची उत्कृष्ट कामगिरी उठून दिसली.
याशिवाय, सांघिक गटातही प्रज्वलने पुणे जिल्ह्याचे प्रतिनिधित्व करत संघाला सुवर्णपदक मिळवून देण्यात महत्त्वाची भूमिका बजावली. त्यामुळे त्याने दुहेरी सुवर्णपदक पटकावत आपली गुणवत्ता सिद्ध केली आहे.
प्रज्वल हा पोलिस उप निरीक्षक धनंजय दाभाडे अंमली पदार्थ विरोधी टास्क फोर्स महाराष्ट्र राज्य,पुणे यांचा सुपुत्र असून, त्याच्या या यशामुळे इंदापूर तालुका आणि पुणे जिल्ह्यातून त्याच्यावर अभिनंदनाचा वर्षाव होत आहे. ग्रामीण भागातून पुढे येत राज्य पातळीवर चमकदार कामगिरी करणाऱ्या प्रज्वलमुळे इतर खेळाडूंनाही प्रेरणा मिळत असल्याचे मत क्रीडाविश्वातून व्यक्त होत आहे.
दरम्यान, प्रज्वलच्या या उत्कृष्ट कामगिरीच्या जोरावर त्याची आंध्रप्रदेशातील गुंटूर येथे होणाऱ्या राष्ट्रीय धनुर्विद्या स्पर्धेसाठी निवड झाली आहे. आगामी राष्ट्रीय स्पर्धेतही तो अशीच उज्वल कामगिरी करेल, अशी अपेक्षा व्यक्त केली जात आहे.
