निवडणुकीच्या पार्श्वभूमीवर उरुळी कांचनमध्ये पोलिसांचा रूट मार्च
✍️नितीन करडे
उरुळी कांचन (ता. हवेली) : आगामी जिल्हा परिषद व पंचायत समिती निवडणुकीच्या पार्श्वभूमीवर कायदा व सुव्यवस्था अबाधित राखण्यासाठी उरुळी कांचन पोलीस स्टेशनच्या वतीने गुरुवार (दि. ०५ फेब्रुवारी २०२६) रोजी सकाळी रूट मार्च आयोजित करण्यात आला. सकाळी १०:५० ते ११:०० या कालावधीत हा रूट मार्च पार पडला.
या रूट मार्चची सुरुवात उरुळी कांचन पीएमटी चौक येथून करण्यात आली. त्यानंतर आश्रम रोड, जय मल्हार रोड, ग्रामपंचायत कार्यालय परिसर, सटवाई चौक, महात्मा गांधी विद्यालय, तळवाडी चौक मार्गे पुन्हा पीएमटी चौक असा मार्ग निश्चित करण्यात आला. त्यानंतर पोलीस स्टेशन येथे रूट मार्चची सांगता करण्यात आली.
या रूट मार्चमध्ये पोलीस निरीक्षक १, सहाय्यक पोलीस निरीक्षक १, पोलीस उपनिरीक्षक ३ तसेच सुमारे ३० पोलीस अंमलदार सहभागी झाले होते. नागरिकांमध्ये सुरक्षा भावना निर्माण करणे, तसेच निवडणूक काळात कायदा व सुव्यवस्था राखण्यासाठी पोलीस प्रशासन सज्ज असल्याचा संदेश देण्यासाठी हा रूट मार्च काढण्यात आला.
रूट मार्च शांततेत व यशस्वीरीत्या पार पडल्याची माहिती पोलिसांकडून देण्यात आली. निवडणूक काळात नागरिकांनी अफवांवर विश्वास न ठेवता शांतता व कायदा सुव्यवस्था राखण्यासाठी प्रशासनाला सहकार्य करावे, असे आवाहन उरुळी कांचन पोलीस स्टेशनचे पोलीस निरीक्षक सचिन वांगडे यांच्या कडून करण्यात आले.
