उरुळी कांचनमध्ये चोरीची दुचाकी १५ महिन्यांनंतर चोरी गेल्याच्या काही अंतरावरच सापडली
✍️ नितीन करडे |
उरुळी कांचन (ता. हवेली) परिसरात चोरी गेलेली दुचाकी तब्बल १५ महिन्यांनंतर सापडल्याची घटना समोर आली आहे. या घटनेमुळे स्थानिकांमध्ये आश्चर्य व्यक्त होत असून, चोरी करणारा नेमका कोण आणि वाहन इतक्या काळ कुठे होते, याबाबत प्रश्नचिन्ह निर्माण झाले आहे.
मिळालेल्या माहितीनुसार, शिंदवणे रोडवरील ‘पांडुरंग कृपा’ येथून २३ डिसेंबर २०२४ रोजी भर दिवसा सकाळी सुमारे साडेनऊच्या सुमारास होंडा कंपनीची पॅशन प्रो (क्र. एमएच १२ एचवाय ६३३४) ही दुचाकी अज्ञात चोरट्याने चोरून नेली होती. या प्रकरणी उरुळी कांचन पोलीस ठाण्यात तक्रार दाखल करण्यात आली होती.
दरम्यान, रविवार (दि. ५ एप्रिल २०२६) रोजी हीच दुचाकी शिंदवणे रोड परिसरात, घरापासून काही अंतरावर संशयास्पद अवस्थेत आढळून आली असल्याचे गाडी मालक मथु दशरथ प्रसाद, (वय ४२ वर्ष) यांनी सांगितले.
निदर्शनास आल्यानंतर संबंधित वाहनाची ओळख पटवून मालक मथु प्रसाद यांनी ११२ (पोलीस मदत) वर कॉल करून मदत मागून घेतली. विशेष म्हणजे, चोरी गेलेले वाहन इतक्या दीर्घ कालावधीनंतर त्याच परिसरात सापडल्याने अनेक प्रश्न निर्माण झाले आहेत. चोरट्याने वाहन वापरले का? की काही कारणास्तव ते लपवून ठेवले होते? अथवा अन्य गुन्ह्यात वापर केल्यानंतर टाकून दिले का? याबाबत चर्चा रंगली आहे.
[उरुळी कांचन पोलिसांकडून या प्रकरणाचा पुढील तपास सुरू असून, वाहन चोरीमागील नेमके कारण आणि आरोपीचा शोध घेण्याचे काम हाती घेण्यात आले आहे. परिसरातील सीसीटीव्ही फुटेजची तपासणी तसेच स्थानिकांकडून चौकशी करून आरोपी लवकरच पोलिसांच्या ताब्यात असेल]
-सचिन वांगडे- पोलीस निरीक्षक,उरुळी कांचन पोलीस स्टेशन
