उरुळी कांचनमध्ये अवैध देशी दारू विक्रीवर पोलिसांची कारवाई; एकावर गुन्हा दाखल
✍️ नितीन करडे
उरुळी कांचन (ता. हवेली): उरुळी कांचन पोलीस ठाण्याच्या हद्दीत जय मल्हार रोड परिसरात अवैध देशी दारूची विक्री करणाऱ्या व्यक्तीवर पोलिसांनी कारवाई करत महाराष्ट्र दारूबंदी अधिनियमांतर्गत गुन्हा दाखल केला आहे.
पोलीसांनी दिलेल्या माहितीनुसार, मंगळवार (दि. ४ ऑगस्ट) सायंकाळी ५.५५ वाजण्याच्या सुमारास जय मल्हार रोड येथील नियामत चिकन सेंटर शेजारी असलेल्या पत्र्याच्या शेडच्या आडोशाला एक व्यक्ती देशी दारूचा साठा बेकायदेशीररीत्या विक्रीसाठी ठेवून ग्राहकांना विक्री करत असल्याची माहिती मिळाली. त्यानुसार पोलिसांनी छापा टाकला असता तात्या शाबू कदम (वय ४५, रा. नायगाव, ता. हवेली, जि. पुणे) हा देशी दारूची विक्री करताना आढळून आला.
कारवाईदरम्यान आरोपीकडून टॅंगो पंच कंपनीच्या ९० मिली मापाच्या १८ प्लास्टिकच्या बाटल्या, एकूण ७२० रुपयांचा मुद्देमाल जप्त करण्यात आला. संबंधित आरोपीविरुद्ध महाराष्ट्र दारूबंदी अधिनियम, १९४९ चे कलम ६५(ई) अंतर्गत गुन्हा दाखल करण्यात आला आहे.
या प्रकरणी पोलीस कॉन्स्टेबल आशिष संजय उल्हाळकर उरुळी कांचन पोलीस स्टेशन यांनी फिर्याद दिली आहे. या प्रकरणाचा पुढील तपास उरुळी कांचन पोलीस करीत आहेत.
