८ महिन्यांपासून फरार असलेला सराईत चेन स्नॅचर अखेर जेरबंद
✍️ नितीन करडे |
पुणे : चेन स्नॅचिंग तसेच पोलीस बतावणी करून फसवणूक करणारा आणि गेल्या आठ महिन्यांपासून फरार असलेला सराईत आरोपी मुसलीम नासीर बेग (इराणी) (वय ३७, रा. पठारे वस्ती, लोणीकाळभोर) याला खंडणी विरोधी पथक-२, गुन्हे शाखा, पुणे शहर यांनी अटक केली.
पोलीस अंमलदार नितीन मुंढे व कानिफनाथ कारखेले यांना मिळालेल्या गोपनीय माहितीच्या आधारे आरोपी लोणीकाळभोर येथील घरासमोर बसलेला असल्याचे समजताच पथकाने सापळा रचून त्याला ताब्यात घेतले. त्यानंतर आरोपीला पुढील कारवाईसाठी वाघोली पोलीस ठाण्याच्या ताब्यात देण्यात आले. सदर आरोपीवर वाघोली पोलीस ठाण्यात गुन्हा दाखल असून शिरूर पोलीस ठाण्यातील गुन्ह्यातही तो पाहिजे आरोपी आहे. तसेच महाराष्ट्रातील विविध ठिकाणी त्याच्यावर चेन स्नॅचिंग, पोलीस बतावणी करून फसवणूक, वाहन चोरी व घरफोडीचे अनेक गुन्हे दाखल असल्याची माहिती पोलिसांनी दिली.
ही कारवाई पोलीस आयुक्त अमितेश कुमार, सहआयुक्त रंजनकुमार शर्मा, अपर आयुक्त पंकज देशमुख, उपायुक्त निखील पिंगळे व सहआयुक्त राजेंद्र मुळीक यांच्या मार्गदर्शनाखाली पोलीस निरीक्षक राम राजमाने व त्यांच्या पथकाने केली.
