फुरसुंगी पोलिसांची धडक कारवाई : नर्तकीवर खर्च करण्यासाठी चोरी करणारा आरोपी अटकेत
६ लाखांहून अधिक किमतीचे सोन्याचे दागिने जप्त
✍️नितीन करडे
पुणे (ता. हवेली) – नर्तकीसोबत बैठकीचा आणि नाचगाण्याचा शौक भागवण्यासाठी चोरी करणाऱ्या आरोपीकडून तब्बल 6,14,420 किमतीचे 5 तोळे वजनाचे सोन्याचे दागिने फुरसुंगी पोलिसांनी अवघ्या काही तासांत जप्त केले. या कारवाईमुळे फिर्यादी तसेच परिसरातील नागरिकांनी समाधान व्यक्त केले आहे.
फिर्यादी अभिजित मधुकर पठारे (रा. होळकरवाडी, हवेली) यांनी दाखल केलेल्या तक्रारीवरून फुरसुंगी पोलीस स्टेशनमध्ये 3 डिसेंबर 2025 रोजी चोरीचा गुन्हा दाखल करण्यात आला होता. गुन्हा दाखल होताच तपास पथकातील अधिकारी आणि अंमलदारांनी परिसरात शोधमोहीम सुरू केली.या दरम्यान पोलीस हवालदार सागर वणवे आणि पोलीस अंमलदार अभिजित टिळेकर यांना गोपनीय बातमीदारामार्फत माहिती मिळाली की, राहुल उत्तम पठारे (वय 39, रा. होळकरवाडी) यांनी चोरीतील काही सोने महंमदवाडी येथील एका ज्वेलर्सकडे विक्रीस दिल्याचे समजले.
पोलीस पथकाने तत्काळ राहुल पठारेच्या घरी छापा टाकून त्याला ताब्यात घेतले. चौकशीदरम्यान आरोपीने गुन्हा केल्याची कबुली दिली. चोरी केलेल्या सोन्यातील काही दागिने आरोपीने महंमदवाडी येथील सोनाराकडे विक्रीस दिले होते. त्याबदल्यात मिळालेल्या 30,000 रकमेचा वापर त्याने स्वतःवर खर्च केल्याचेही तपासात समोर आले. तपास पथकाने तत्काळ सोनाराकडून विक्री झालेले दागिने तसेच आरोपीकडील उर्वरित मुद्देमाल जप्त केला. एकूण ₹6,14,420 किमतीचे ५ तोळे सोन्याचे दागिने पुरावा म्हणून हस्तगत करण्यात आले.
ही कारवाई डॉ. राजकुमार शिंदे (पोलीस उप-आयुक्त, परिमंडळ 5), अनुराधा उदमले (सहायक पोलीस आयुक्त, हडपसर विभाग), अमोल मोरे (वरिष्ठ पोलीस निरीक्षक) यांच्या मार्गदर्शनाखाली करण्यात आली. पोलीस निरीक्षक (गुन्हे) राजेश खांडे, पो. उप.नि. विष्णु देशमुख, अधिकारी महेश नलवडे, पोहवा नितीन गायकवाड, सागर वणवे, श्रीनाथ जाधव, हरीदास कदम, सतिश काळे, महेश उबाळे, पो.कॉ. अभिजित टिळेकर, बिभिषण कुंटेवाड, वैभव भोसले यांच्या पथकाने ही संयुक्त कारवाई केली.
फिर्यादी अभिजित पठारे तसेच परिसरातील नागरिकांनी पोलिसांच्या तत्पर आणि अचूक कामगिरीबद्दल समाधान व्यक्त केले आहे. पुढील तपास पो उपनि विष्णु देशमुख हे करीत आहेत.
