दहावीच्या परीक्षेदरम्यान उरुळी कांचनमध्ये विद्यार्थ्यांना त्रास; बुलेट-स्प्लेंडरचा फटाक्यासारखा आवाज काढत तरुणांच्या फेऱ्या?
उरुळी कांचन : सध्या दहावीच्या परीक्षा सुरू असताना (ता. १३ मार्च) रोजी उरुळी कांचन (ता. हवेली) येथील काही शाळांच्या परिसरात बुलेट व स्प्लेंडर सारख्या दुचाकींचा फटाक्यासारखा मोठा आवाज काढत काही तरुणांकडून फेऱ्या मारण्याचा प्रकार सुरू असल्याचे समोर आले आहे. परीक्षा देण्यासाठी आलेल्या विद्यार्थ्यांना यामुळे नाहक त्रास सहन करावा लागत असल्याची तक्रार पालक व नागरिकांनी केली आहे.
विशेष म्हणजे एका बुलेटवर पोलीस वाहतूक चिन्ह (ट्रॅफिक सिम्बॉल) असलेली गाडी देखील बार काढत परिसरात फिरताना दिसल्याची माहिती मिळत आहे. हे रोड रोमिओ शाळा भरताना व सुटताना दिसून येत असल्याचे पालकांनी सांगितले. तसेच काही रोडरोमिओ शाळा परिसरात वारंवार फेऱ्या मारत असल्याने विद्यार्थिनी व पालकांमध्ये नाराजी व्यक्त केली जात आहे.
परीक्षा केंद्रांच्या परिसरात शांतता राखण्याची गरज असताना अशा प्रकारांमुळे विद्यार्थ्यांचे लक्ष विचलित होत असल्याचे नागरिकांचे म्हणणे आहे. या प्रकाराकडे तात्काळ लक्ष देऊन संबंधितांवर कारवाई करावी, अशी मागणी पालक व नागरिकांकडून करण्यात येत आहे.
रोड रोमिओचे फेऱ्या मारण्याची थांबण्याचे ठिकाणे –
जुने महादेव मंदिर, कल्याण स्वीट, चोरघे बिल्डिंग, जिजाऊ सभागृह परिसर, एमजी रोड परिसर
