चंदननगर पोलिसांची तत्परता; आत्महत्येचा प्रयत्न हाणून पाडत व्यक्तीचे प्राण वाचवले
| नितीन करडे |
पुणे प्रतिनिधी : चंदननगर पोलिसांनी आत्महत्येचा प्रयत्न हाणून पाडत व्यक्तीचे प्राण वाचवले. पोलीसांचे परिसरात कौतुक होत आहे. ता. 27 एप्रिल चंदननगर पोलीस स्टेशनच्या मार्शल पथकाने दाखवलेल्या धाडस आणि तत्परतेमुळे एका व्यक्तीचे प्राण वाचल्याची घटना समोर आली आहे. पोलीस अंमलदार क्र. 2817 तलवारे आणि पोलीस अंमलदार क्र. 779 सतीश कतारी यांनी वेळेवर हस्तक्षेप करत आत्महत्येचा प्रयत्न हाणून पाडला.
मिळालेल्या माहितीनुसार, दोन्ही पोलीस अंमलदार महात्मा फुले मार्शल पथकात दिवसपाळी कर्तव्यावर असताना सायंकाळी 7:08 वाजण्याच्या सुमारास एम.डी.टी. मशीनवर CFS36230850 द्वारे ‘Suicide Attempt’ संदर्भात कॉल प्राप्त झाला. तत्काळ त्यांनी कॉलरशी संपर्क साधला असता, संबंधित व्यक्ती घरी नसून त्यांच्या वडिलांनी घराचा दरवाजा आतून बंद करून आत्महत्येचा प्रयत्न सुरू केल्याची धक्कादायक माहिती मिळाली.
घटनेचे गांभीर्य ओळखून मार्शल पथकाने दिलेल्या पत्त्यावर तातडीने धाव घेतली. दरवाजा आतून बंद असल्याने त्यांनी तात्काळ वेल्डरला बोलावून दरवाजा उघडला. दरवाजा उघडताच संबंधित व्यक्ती गळफास घेण्याच्या स्थितीत आढळून आली. कोणतीही वेळ न दवडता दोन्ही अंमलदारांनी त्यांना खाली उतरवून सुरक्षितपणे बेडवर बसवले.
यानंतर त्यांनी तात्काळ नातेवाईकांशी संपर्क साधून संबंधित व्यक्तीस जवळच्या रुग्णालयात उपचारासाठी पाठवले. प्राथमिक उपचारानंतर त्या व्यक्तीस पुढील समुपदेशनासाठी पोलीस स्टेशन येथे आणण्यात आले. पोलिसांनी योग्य मार्गदर्शन करत संबंधित व्यक्तीस त्यांच्या कुटुंबाच्या ताब्यात दिले. दरम्यान, या उल्लेखनीय आणि जीव वाचवणाऱ्या कामगिरीबद्दल दोन्ही पोलीस अंमलदारांचा चंदननगर पोलीस स्टेशन येथे वरिष्ठ पोलीस निरीक्षक निलेश बडाख तसेच पोलीस निरीक्षक (गुन्हे) अमोल धस यांच्या हस्ते सत्कार करण्यात आला.
या घटनेमुळे चंदननगर पोलिसांची तत्परता, संवेदनशीलता आणि समाजाप्रती असलेली जबाबदारी पुन्हा एकदा अधोरेखित झाली आहे.
