उरुळी कांचनमध्ये चोरांचा धुमाकूळ! महामार्गालगतची दूध डेअरी फोडून सुमारे ६० हजारांची रोकड लंपास; तीन चोर सीसीटीव्हीत कैद
✍️ नितीन करडे
उरुळी कांचन प्रतिनिधी : उरुळी कांचन (ता. हवेली) परिसरात चोऱ्यांच्या घटना दिवसेंदिवस वाढत असून नागरिकांमध्ये भीतीचे वातावरण निर्माण झाले आहे. मंगळवार (ता. २१ जुलै) रोजी मध्यरात्री सुमारे २.३० वाजण्याच्या दरम्यान पुणे–सोलापूर महामार्गालगत असलेल्या एका दूध डेअरीवर चोरट्यांनी धाडसी डल्ला मारत शटर उचकटून आत प्रवेश केला.
चोरट्यांनी डेअरीतील सुमारे ६० हजार रुपयांच्या दरम्यान रोकड लंपास केली. तसेच दुकानातील सुमारे २ हजार रुपयांच्या कॅडबरी चॉकलेट्सही चोरी करून नेल्याची माहिती डेअरी मालकाने दिली आहे. या संपूर्ण चोरीची घटना दुकानात बसविण्यात आलेल्या सीसीटीव्ही कॅमेऱ्यात कैद झाली असून, त्यामध्ये तीन चोर स्पष्टपणे दिसत आहेत. चोरांनी काही मिनिटांतच चोरी करून घटनास्थळावरून पलायन केले.
उरुळी कांचन परिसरात यापूर्वीही मोटारसायकल चोरी, वाहनांच्या बॅटऱ्या आणि इतर गुन्ह्यांच्या घटना घडल्या आहेत. आता महामार्गालगतच्या डेअरीवर झालेल्या या चोरीमुळे व्यापाऱ्यांमध्ये मोठी चिंता निर्माण झाली आहे.
सीसीटीव्हीच्या आधारे पोलिसांनी तातडीने आरोपींचा शोध घेऊन त्यांना अटक करावी, तसेच उरुळी कांचन परिसरात रात्रीची पोलिस गस्त वाढवावी, अशी मागणी व्यापारी व नागरिकांकडून केली जात आहे.
