उरळगाव–न्हावरा परिसरातील वीजप्रश्नांना दिलासा; ५ एम.व्ही.ए. पॉवर रोहित्र व ११ केव्ही लिंक लाईनचे लोकार्पण
✍️ नितीन करडे
पुणे : शिरूर-हवेली मतदारसंघातील उरळगाव, न्हावरा, आलेगावपागा व परिसरातील वीजप्रश्न सोडविण्यासाठी मुख्यमंत्री सौर कृषी वाहिनी योजना २.० अंतर्गत उभारण्यात आलेल्या अतिरिक्त ५ एम.व्ही.ए. पॉवर रोहित्र व ११ केव्ही, ६ कि.मी. लिंक लाईन प्रकल्पाचे लोकार्पण आमदार माऊली आबा कटके यांच्या हस्ते नाव्हारे उपकेंद्रात करण्यात आले. सुमारे २ कोटी रुपये खर्चाच्या या प्रकल्पामुळे हजारो शेतकरी व नागरिकांना दर्जेदार व अखंडित वीजपुरवठ्याचा लाभ मिळणार आहे.
या प्रकल्पामुळे उरळगाव, न्हावरा, कोळपे वस्ती, निंबाळकर वस्ती व आलेगावपागा परिसरातील वीजयंत्रणा अधिक सक्षम होणार असून, नव्या रोहित्रावरून दोन स्वतंत्र कृषी वाहिन्या सुरू करण्यात येणार आहेत. त्यामुळे विद्यमान १० एम.व्ही.ए. रोहित्रावरील भार कमी होऊन व्होल्टेज, सिंगल फेजिंग व अपुऱ्या वीजपुरवठ्याच्या समस्या मोठ्या प्रमाणात कमी होणार आहेत.
यावेळी आमदार माऊली आबा कटके यांनी, ग्रामीण भागातील प्रत्येक शेतकऱ्याला दर्जेदार वीजपुरवठा मिळावा, यासाठी शासनाकडे सातत्याने पाठपुरावा सुरू राहील, असे सांगितले. उपस्थित नागरिकांनी या प्रकल्पामुळे शेती व घरगुती वीजपुरवठा अधिक विश्वासार्ह होणार असल्याचे सांगत समाधान व्यक्त केले.
