उरुळी कांचन–सोरतापवाडीत शटरफोडींचा धुमाकूळ!
एका रात्रीत दोन ठिकाणी चोरी; सीसीटीव्हीत तीन चोर कैद, परिसरात टोळी सक्रिय असल्याची चर्चा
✍️ नितीन करडे
उरुळी कांचन (प्रतिनिधी): पुणे–सोलापूर महामार्गालगत उरुळी कांचन व सोरतापवाडी (ता. हवेली) परिसरात शटरफोडीच्या घटना सातत्याने वाढत असून व्यापाऱ्यांमध्ये भीतीचे वातावरण निर्माण झाले आहे. रविवारी (दि. 26 जुलै) रोजी मध्यरात्री साडेबारा वाजण्याच्या दरम्यान अज्ञात तीन चोरट्यांनी उरुळी कांचन येथील माऊली हॉस्पिटल समोरील मल्हार मेडिकलचे शटर उचकटून 25 ते 27 हजारांच्या दरम्यान रोख रक्कम लंपास केली असल्याची माहिती समोर आली असुन या घटनेतील तिन्ही चोर दुकानातील सीसीटीव्ही कॅमेऱ्यात स्पष्टपणे कैद झाले आहेत.
याच रात्री सोरतापवाडी (ता. हवेली) येथेही एका हार्डवेअर दुकानाचे शटर उचकटून दुकानातील वायरींचे बंडल आणि रोख रक्कम चोरी करण्यात आली. त्यामुळे एका रात्रीत दोन वेगवेगळ्या ठिकाणी झालेल्या शटरफोडींमुळे व्यापाऱ्यांमध्ये मोठी खळबळ उडाली आहे.
विशेष म्हणजे, अवघ्या पाच दिवसांपूर्वी उरुळी कांचन येथे पुणे–सोलापूर महामार्गालगत असलेल्या एका दूध डेरीचे शटर उचकटून रोकड व काही साहित्य चोरी करण्यात आले होते. त्यानंतर पुन्हा ही घटना घडल्याने शटरफोड करणारी एकच टोळी परिसरात सक्रिय असल्याचा संशय व्यक्त केला जात आहे.
याशिवाय, आठ दिवसांपूर्वी सोरतापवाडी येथील स्वीट होम दुकानाचे शटर उचकटून आत प्रवेश करण्याचा प्रयत्नही चोरट्यांनी केला होता. मात्र, दुकानाच्या आत कामगार झोपलेले असल्याने चोरांनी तेथून पळ काढल्याची माहिती समोर आली आहे.
सलग घडणाऱ्या या घटनांमुळे पुणे–सोलापूर महामार्गालगतच्या व्यापाऱ्यांमध्ये प्रचंड असुरक्षिततेची भावना निर्माण झाली आहे. सीसीटीव्हीत चोरांचे चेहरे स्पष्ट दिसत असतानाही चोरीच्या घटनांना आळा बसत नसल्याने पोलिसांच्या गस्तीवरही प्रश्नचिन्ह उपस्थित केले जात आहे.
चोरी करताना चोर सीसीटीव्ही मध्ये कैद व्हिडिओ –
व्यापाऱ्यांनी रात्रीच्या गस्तीत वाढ करावी, शटरफोडी करणाऱ्या टोळीचा तातडीने शोध घेऊन कठोर कारवाई करावी, अशी जोरदार मागणी केली जात आहे. एकाच पद्धतीने शटर उचकटून चोरी होत असल्याने या सर्व घटनांमागे एकाच सराईत टोळीचा हात असण्याची शक्यता नाकारता येत नाही.
पोलीस तपासानंतरच या सर्व घटनांमागील सत्य स्पष्ट होणार असले, तरी सलग शटरफोडींनी उरुळी कांचन व सोरतापवाडी परिसरातील व्यापाऱ्यांची झोप उडवली आहे.
