पुरंदर विमानतळाबाबत खोटी माहिती प्रसारित; सासवड पोलीस ठाण्यात अज्ञाताविरोधात गुन्हा दाखल
✍️ नितीन करडे
पुणे, प्रतिनिधी : छत्रपती संभाजीराजे आंतरराष्ट्रीय विमानतळ, पुरंदर प्रकल्पाबाबत खोटी व दिशाभूल करणारी माहिती सोशल मीडियावर प्रसारित केल्याप्रकरणी सासवड पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
याप्रकरणी संतोष हरी बरगे (वय 37, रा. तिनेवाडी रोड, बच्चेपाटील कॉलनी, राजगुरूनगर, ता. खेड, जि. पुणे) यांनी फिर्याद दिली असून भारतीय न्याय संहिता कलम 336(2) व 336(4) अंतर्गत गुन्हा नोंदविण्यात आला आहे.
पोलिसांनी दिलेल्या माहितीनुसार, दि. 12 मे रोजी दुपारी 1 वाजण्याच्या सुमारास उदाचीवाडी, खानवडी, कुंभारवळण, पारगाव, एखतपूर व मुंजवडी परिसरातील शेतकरी व्हॉट्सअॅप ग्रुपवर एका अज्ञात व्यक्तीने संबंधित कार्यालयाच्या नावाने बनावट लेटरपॅड तयार करून खोटे पत्र प्रसारित केले. या पत्रात “छत्रपती संभाजीराजे आंतरराष्ट्रीय विमानतळ, पुरंदर प्रकल्पासाठी प्रस्तावित जागा तांत्रिक तपासणीनंतर अयोग्य ठरविण्यात आली आहे,” असा मजकूर नमूद करण्यात आला होता.
या बनावट पत्रामुळे पुरंदर तालुक्यातील नागरिक व शेतकऱ्यांच्या मनात भूसंपादन प्रक्रियेबाबत संभ्रम निर्माण झाल्याचे फिर्यादीत नमूद करण्यात आले आहे. प्रकरणाचा पुढील तपास सासवड पोलीस करीत आहेत.
