पुणे–सोलापूर महामार्गावर भीषण वाहतूक कोंडी; वाहनांच्या पाच-पाच रांगा; रुग्णवाहिकाही अडकल्या, नागरिक त्रस्त
✍️नितीन करडे
पुणे : पुणे–सोलापूर महामार्गावर शुक्रवारी ता. 7 नोव्हेंबर रोजी सायंकाळी भीषण वाहतूक कोंडीची परिस्थिती निर्माण झाली असून रवी दर्शन ते फुरसुंगी चौक या परिसरात सोलापूरकडे जाणाऱ्या वाहनांची तर फुरसुंगी फाटा ते कदमवाक वस्ती या भागात पुण्याकडे जाणाऱ्या वाहनांच्या लांबच लांब रांग पाहायला मिळत आहे. काही ठिकाणी वाहतूक पूर्णपणे ठप्प झाली असून अनेक वाहनचालकांना दोन ते तीन तासांपेक्षा जास्त वेळ रस्त्यावर अडकून पडावे लागले.
रुग्णवाहिकाही अडकल्या, उलट दिशेने वाहने धावू लागली
वाहतूक कोंडी इतकी तीव्र झाली की काही वाहनचालकांनी अक्षरशः विरुद्ध दिशेने वाहने वळवून पुढचा मार्ग काढण्याचा प्रयत्न केला. या गोंधळात अनेक रुग्णवाहिका देखील कोंडीत अडकून राहिल्या, ज्यामुळे नागरिकांमध्ये प्रचंड नाराजी व्यक्त केली जात आहे.
या कोंडीबाबत वाहनचालकांनी मोठा संताप व्यक्त केला
“शेवळवाडी मार्केटपासून फुरसुंगी फाट्यापर्यंत पोहोचण्यासाठी आम्हाला दोन ते अडीच तास लागले. खूप वेळापासून वाहतूक ठप्प होती. अनेक वाहनांनी उलट्या दिशेने जाऊन वाहतूक आणखीन विस्कळीत केली.”
: सिंगूदेव खताळ, एक वाहन चालक
“अडीच तास होत आले, पण आम्ही अजूनही कोंडीत अडकून आहोत. पुण्याकडे जाणाऱ्या वाहनांनी तर पाच-पाच रांगा लावल्या. बेशिस्त वाहन चालक आणि योग्य नियंत्रणाचा अभाव यामुळे परिस्थिती बिकट झाली आहे. पोलीस नेमके कुठे आहेत?”
: दीपक टीकोळे- वाहनचालक
पोलीस यंत्रणा कुठे नागरिकांचा सवाल ?
स्थानिक नागरिक आणि वाहनचालकांच्या मते, काही ठिकाणी वाहतूक व्यवस्थापनासाठी पोलीस दिसले नाहीत, ज्यामुळे वाहन चालवणाऱ्यांनी मनमानी मार्ग अवलंबला, यामुळे कोंडी आणखी वाढली, कोंडीचे कारण अद्याप स्पष्ट नाही.
घटनास्थळी पोलीस किंवा संबंधित वाहतूक विभागाकडून अधिकृत माहिती मिळालेली नसली तरी, वाढलेली भारी वाहनांची ये-जा, किंवा एखादा अपघात, ही संभाव्य कारणे असल्याचे प्राथमिक अंदाज व्यक्त केले जात आहेत.
नागरिकांना मोठा त्रास
दररोज या मार्गाने प्रवास करणारे हजारो नागरिक, कामगार, कार्यालयीन कर्मचारी, विद्यार्थी आणि व्यापारी यांना प्रवासात दुप्पट-तिप्पट वेळ लागत आहे. अनेकांच्या कामांमध्ये अडथळे निर्माण झाले आहेत.
