नायगाव फाटा परिसरातून १६ वर्षीय मुलाचे अपहरण; उरुळी कांचन पोलिसांत गुन्हा दाखल
उरुळी कांचन प्रतिनिधी : नायगाव फाटा (ता. हवेली) परिसरातील श्रेयस रोज नर्सरी येथून १६ वर्षीय मुलगा बेपत्ता झाल्याची घटना समोर आली असून, या प्रकरणी अज्ञात इसमाविरुद्ध उरुळी कांचन पोलीस ठाण्यात अपहरणाचा गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, फिर्यादी संदीप शामराव शिंदे (वय ४१, व्यवसाय मजुरी, रा. श्रेयस रोज नर्सरी, नायगाव फाटा, ता. हवेली, जि. पुणे) यांनी उरुळी कांचन पोलीस ठाण्यात फिर्याद दिली आहे. त्यानुसार अज्ञात इसमाविरुद्ध गुन्हा दाखल करण्यात आला आहे.
फिर्यादीत नमूद केल्यानुसार, (ता.२१ मे२०२६) रोजी सकाळी ११ वाजण्याच्या सुमारास फिर्यादी व त्यांची पत्नी श्रेयस रोज नर्सरी येथे काम करत होते. त्यावेळी त्यांचा मुलगा पियुष संदीप शिंदे (वय १६ वर्षे १० महिने) हा घरी होता. घरातील किरकोळ कारणावरून आईने त्याला लहान भावासोबत भांडू नको, असे सांगितले होते. त्यानंतर पियुष कोणालाही काहीही न सांगता घरातून निघून गेला.
कुटुंबीयांनी त्याचा सर्वत्र शोध घेतला, मात्र तो अद्याप मिळून आलेला नसल्याने अज्ञात इसमाने त्याला फूस लावून किंवा पळवून नेल्याचा संशय व्यक्त करण्यात आला आहे.
बेपत्ता मुलाचे वर्णन : पियुष याची उंची सुमारे ४ फूट, रंग गोरा, अंगाने सडपातळ असून अंगात पांढऱ्या रंगाचा शर्ट व निळ्या रंगाची जिन्स पॅन्ट होती. पायात निळ्या रंगाची सँडल असून डोक्यावर जुन्या जखमेची खुण आहे.
पुढील तपास पोलीस निरीक्षक सचिन वांगडे यांच्या मार्गदर्शनाखाली ग्रेड पोलीस उपनिरीक्षक बापुसाहेब मत्रे हे करीत आहेत. पोलीसांना फिर्यादी यांनी सांगितले की या आधीही तो दोन ते तीन वेळा घरातून निघून गेला होता असे पोलिसांनी सांगितले. तसेच पोलीस निरीक्षक सचिन वांगडे यांनी नागरिकांना आवाहन केले आहे की सदर मुला बाबत काही माहिती मिळाल्यास त्वरित पुढील नंबर वर संपर्क साधावा.
उरुळी कांचन पोलीस स्टेशन- 020-26926287 बापूसाहेब मत्रे – 9552576117
