उरुळी कांचनच्या हेमलता बडेकर यांची राज्यस्तरीय महिला आघाडीच्या प्रमुखपदी नियुक्ती
उरुळी कांचन : अखिल महाराष्ट्र राज्य स्वस्त धान्य दुकानदार केरोसीन परवानाधारक महासंघाच्या राज्यस्तरीय महिला आघाडीच्या प्रमुखपदी उरुळी कांचन येथील हेमलता बाळासाहेब बडेकर यांची नियुक्ती करण्यात आली आहे. त्यांच्या या नियुक्तीमुळे उरुळी कांचनच्या शिरपेचात आणखी एक मानाचा तुरा रोवला गेला आहे.
बडेकर नगर, उरुळी कांचन, ता. हवेली येथील रहिवासी असलेल्या हेमलता बडेकर यांच्यावर राज्यभरातील महिला स्वस्त धान्य दुकानदार तसेच महिला बचत गटांच्या स्वस्त धान्य दुकानांमध्ये समन्वय साधण्याची महत्त्वाची जबाबदारी सोपविण्यात आली आहे.
महासंघाच्या वतीने देण्यात आलेल्या नियुक्तीपत्रात राज्यभरातील महिला परवानाधारकांच्या अडचणी, स्वस्त धान्य दुकानांच्या समस्या, परवाना संदर्भातील प्रश्न तसेच शासनाच्या विविध धोरणात्मक निर्णयांबाबत महिलांच्या वतीने प्रभावीपणे काम करण्याची अपेक्षा व्यक्त करण्यात आली आहे.
राज्यात मोठ्या संख्येने महिला स्वस्त धान्य दुकानांच्या माध्यमातून सार्वजनिक वितरण व्यवस्थेत महत्त्वपूर्ण योगदान देत आहेत. मात्र, या महिलांना परवाना, दुकान संचालन, शासकीय नियम, प्रशासकीय प्रक्रिया आणि विविध धोरणात्मक निर्णयांशी संबंधित अनेक अडचणींना सामोरे जावे लागते. या पार्श्वभूमीवर महिला दुकानदारांच्या प्रश्नांना संघटित व्यासपीठ मिळवून देणे आणि त्यांच्या समस्या शासनाच्या निदर्शनास आणून देण्यासाठी हेमलता बडेकर यांची भूमिका महत्त्वाची ठरणार आहे.
राज्यस्तरीय महिला आघाडीच्या प्रमुख म्हणून राज्यभरातील परवानाधारक महिलांचे सक्षमीकरण, त्यांच्या अडचणींचे निराकरण करण्यासाठी पाठपुरावा तसेच परवाना संदर्भातील धोरणात्मक व शासकीय निर्णयांच्या दृष्टीने सातत्याने कार्य करण्याची जबाबदारी त्या पार पाडणार आहेत.
या नियुक्तीमुळे उरुळी कांचन परिसरातून राज्यस्तरावर महिलांच्या प्रश्नांसाठी काम करण्याची संधी हेमलता बडेकर यांना मिळाली असून, त्यांच्या नियुक्तीचे परिसरातून स्वागत होत आहे. त्यांच्या अनुभवाचा आणि संघटनात्मक कार्याचा उपयोग राज्यातील महिला स्वस्त धान्य दुकानदारांना निश्चितच होईल, असा विश्वास व्यक्त करण्यात येत आहे.
